ಲಂಡನ್: ಜಾಗತಿಕ ಸುವಾರ್ತೆ ಪ್ರಚಾರದ ಇತಿಹಾಸದಲ್ಲಿ ಮಹತ್ವದ ಮೈಲಿಗಲ್ಲಾಗುವ ಸಾಧನೆಯನ್ನು ವಿಶ್ವ ಬೈಬಲ್ ಸೊಸೈಟಿಗಳು ದಾಖಲಿಸಿವೆ. ವಿಶ್ವದ 2,600ಕ್ಕೂ ಹೆಚ್ಚು ವಿವಿಧ ಭಾಷೆಗಳಲ್ಲಿ ಹೊಸ ಒಡಂಬಡಿಕೆ (New Testament) ಸಂಪೂರ್ಣವಾಗಿ ಭಾಷಾಂತರಗೊಂಡು ಲಭ್ಯವಾಗಿದೆ ಎಂದು United Bible Societies (UBS) ತನ್ನ ಸಂಯುಕ್ತ ಪ್ರಕಟಣೆಯಲ್ಲಿ ತಿಳಿಸಿದೆ.
ಇತಿಹಾಸದಲ್ಲೇ ಮೊದಲ ಬಾರಿಗೆ ಇಷ್ಟೊಂದು ಸ್ಥಳೀಯ ಹಾಗೂ ಪ್ರಾದೇಶಿಕ ಭಾಷೆಗಳಲ್ಲಿ ದೇವರ ವಾಕ್ಯ ಜನರಿಗೆ ತಲುಪುವಂತಾಗಿದೆ. ವಿವಿಧ ದೇಶಗಳ ಗ್ರಾಮೀಣ ಪ್ರದೇಶಗಳಲ್ಲಿನ ಬುಡಕಟ್ಟು ಭಾಷೆಗಳು, ಲಿಪಿಯಿಲ್ಲದ ಉಪಭಾಷೆಗಳು ಸೇರಿದಂತೆ ಅನೇಕ ಭಾಷೆಗಳ ಕುರಿತು ಆಳವಾದ ಅಧ್ಯಯನ ನಡೆಸಿ ಈ ಮಹತ್ವದ ಕಾರ್ಯವನ್ನು ಪೂರ್ಣಗೊಳಿಸಲಾಗಿದೆ.
ಆಧುನಿಕ ಡಿಜಿಟಲ್ ತಂತ್ರಜ್ಞಾನ ಹಾಗೂ ಕೃತಕ ಬುದ್ಧಿಮತ್ತೆ (AI) ಆಧಾರಿತ ಭಾಷಾಂತರ ಸಾಫ್ಟ್ವೇರ್ಗಳ ಸಹಾಯದಿಂದ ಈ ಪ್ರಕ್ರಿಯೆ ವೇಗವಾಗಿ ಮುನ್ನಡೆಯಿತು ಎಂದು ಬೈಬಲ್ ಸೊಸೈಟಿ ಅಧಿಕಾರಿಗಳು ತಿಳಿಸಿದ್ದಾರೆ. ಇದರ ಪರಿಣಾಮವಾಗಿ ವಿಶ್ವದ ಬಹುತೇಕ ಜನರು ತಮ್ಮ ಮಾತೃಭಾಷೆಯಲ್ಲಿಯೇ ದೇವರ ವಾಕ್ಯವನ್ನು ಓದಿ ಅರ್ಥಮಾಡಿಕೊಳ್ಳುವ ಅವಕಾಶ ಪಡೆದಿದ್ದಾರೆ.
ಈ ಸಾಧನೆಯ ಹಿಂದೆ ವಿವಿಧ ಚರ್ಚುಗಳು, ಮಿಷನರಿ ಸಂಸ್ಥೆಗಳು ಮತ್ತು ಭಾಷಾ ತಜ್ಞರ ಹಲವು ವರ್ಷಗಳ ನಿರಂತರ ಪರಿಶ್ರಮ ಹಾಗೂ ಆರ್ಥಿಕ ಸಹಕಾರವಿದೆ. ಹೊಸ ಒಡಂಬಡಿಕೆಯ ಭಾಷಾಂತರ ಪೂರ್ಣಗೊಂಡಿರುವ ಭಾಷೆಗಳಲ್ಲಿ ಹಳೆಯ ಒಡಂಬಡಿಕೆಯ ಪುಸ್ತಕಗಳ ಭಾಷಾಂತರ ಕಾರ್ಯವೂ ವೇಗವಾಗಿ ಸಾಗುತ್ತಿದೆ.
ಭಾಷಾಂತರಗೊಂಡಿರುವ ಬಹುತೇಕ ಬೈಬಲ್ಗಳು ಮುದ್ರಿತ ಪ್ರತಿಗಳ ಜೊತೆಗೆ ಮೊಬೈಲ್ ಆ್ಯಪ್ಗಳು, ಆಡಿಯೋ ಬೈಬಲ್ಗಳು ಹಾಗೂ ಡಿಜಿಟಲ್ ವೇದಿಕೆಗಳಲ್ಲಿಯೂ ಲಭ್ಯವಾಗಿವೆ. ಈ ಐತಿಹಾಸಿಕ ಸಾಧನೆಯ ಮೂಲಕ ಕ್ರಿಸ್ತನ ಸುವಾರ್ತೆ ಮುಂದಿನ ತಲೆಮಾರುಗಳಿಗೆ ಇನ್ನಷ್ಟು ಆಳವಾಗಿ ತಲುಪಲಿದೆ ಎಂಬ ವಿಶ್ವಾಸವನ್ನು ಜಾಗತಿಕ ಕ್ರೈಸ್ತ ನಾಯಕತ್ವ ವ್ಯಕ್ತಪಡಿಸಿದೆ.